... ఇవాళ్టి రాజకీయాల్లో నేరారోపణలు

వంశీ వ్యూ పాయింట్ // ... ఇవాళ్టి రాజకీయాల్లో నేరారోపణలు // 

***************************************************************

            రాజకీయాల్లో నేరారోపణలు అన్నది ఒక రకంగా క్లిష్టమైన అంశం - ఎందుకంటే ఇవాళ రాజకీయాలు పూర్తిగా భ్రష్టు పట్టిపోయాయి. కేవలం అవినీతి అన్నది ఒక్కటే అంశం కాదు ఇపుడు. కేసుల విషయం అంటే - అవతలి వ్యక్తిని దెబ్బ తీయటానికి, ఇవతలి పక్షం వారు లేదా అధికారంలో ఉన్నవారు ఏదో ఒక కేసు పెట్టి, అధికార వ్యవస్థలను మేనేజ్ జైలు లో ఉంచవచ్చు. అతగాడి మీద నిజంగానే అబద్ధపు ఆరోపణలు చేయబడి ఉండవచ్చు, కొన్నాళ్ళ తరువాత అవి నిక్కంగా అబద్ధం అని తేలితే? మనం నమ్మే పరిస్థితుల్లో లేము ఎందుకంటే, ఇపుడు మనమెవరమూ నిజాయితీగా లేము, పార్టీలను/వ్యక్తులను అభిమానించే వారిగా విడిపోయాము. నిందారోపణలు నిరూపించబడి, శిక్షను అనుభవించిన (శిక్షకు, నిర్బంధానికి తేడా తెలుసుకోవాలి) వారిని కూడా అభిమానిస్తున్న రోజులివి. రేప్పొద్దున ఇవాళ సచ్చిలుడుగా పేరొందిన వారు ఎవరైనా, నిందలు నిరూపింపబడి జైలుకెళ్ళినా అది మనం రాజకీయ కక్ష సాధింపుగానే చూస్తాం. ఎందుకంటే సాధారణంగా ప్రతిపక్షంలో ఉన్నవారు లేదా అధికార పార్టీకి ఎదురు తిరిగినవారు మాత్రమే ఆరోపణలు కారణంగా జైలుకెళతారు. అధికారంలో ఉన్నవారైతే ఎన్ని కేసులున్నా స్టేలు తెచ్చుకోవడం లేదా వ్యవస్థల్ని మేనేజ్ చేయడం చేస్తూ గడిపేస్తారు. అందుకే, కొందరు ఉన్నత స్థాయిలో ఎవరు అధికారంలో ఉంటే వారితో లోపాయికారి ఒప్పందాలతో నిప్పులాగా కాలం గడిపేస్తారు. ప్రతిపక్షంలో ఉన్నవారు అధికారపక్షంపై ఆరోపణలు చేయడం అత్యంత సహజం - అవినీతి జరిగిందని విపరీతంగా ప్రచారం చేస్తారు. 

            నిజం చెప్పాలంటే ఏ పార్టీ అధికారంలో ఉన్నా అవినీతి అన్నది ఖచ్చితంగా జరగాల్సిన స్థితిలో ప్రస్తుత రాజకీయాలు మనుగడ సాగిస్తున్నాయి. కానీ, ఇపుడు ప్రతిపక్షంలో ఉన్న పార్టీ రేప్పొద్దున అధికారంలోకి రాగానే, మొదట విచారణ అదీ ఇదీ అంటూ హడావుడి చేసనప్పటికీ ఆ తరువాత మళ్ళీ ప్రెస్ మీట్స్ లో లేదా అసెంబ్లీలో ప్రత్యారోపణలు చేసుకోవటానికి తప్పించి మరెందుకూ పనికిరావవి. ఇందుకు ఉదాహరణగా వైఎస్సార్సీపీ అధినేత జగన్ గారిపై లక్ష కోట్ల అవినీతి ఆరోపణలు అని చెప్పవచ్చు. 2011 నుండి ఆ ఆరోపణలు చేస్తూనే ఉన్నారు. అవి విచారణలో ఉన్న దశలో సాక్షులను ప్రభావితం చేయగలరనే నెపం మీద దాదాపు 18 నెలలు జైలులో నిర్బంధించారు కూడా. అయినా ఇంతవరకూ ఏవీ నిరూపించకలేకపోగా, ముందుగా పేర్కొన్నట్టు అవి లక్ష కోట్లు కాదు కదా, అందులో పావు వంతు కూడా కాదు - చివరకు 1200 కోట్లకు చార్జిషీట్లు చేసినట్టున్నారు. ఇదే అంశంపై జగన్ గారు గతంలో అసెంబ్లీలో ఛాలెంజ్ చేశారు కూడా. ఇక్కడ జగన్ అవినీతి చేశాడా లేదా అన్నదానిమీద నేను వ్యాఖ్యానించను, ఎందుకంటే అది ప్రస్తుతం న్యాయస్థానాల్లో విచారణ దశలో ఉంది - పలుమార్లు విచారణ త్వరిత గతిన పూర్తి చేయమని స్వయంగా ఆయనే పిటేషన్ వేశారు కూడా. కానీ, ఇపుడు అధికారంలో ఉన్నవారుగాత అయిదు సంవత్సరాలుగా అదే మాటలు మాట్లాడటమే తప్పించి, ఏమైనా నిరూపించగలిగారా? అదే సమయంలో గతంలో అధికారంలో ఉండిన కాంగ్రెస్, చంద్రబాబు గారి మీద చేసిన ఆరోపణలూ అంతే. దశాబ్దకాలం పాటు అధికారంలో ఉన్న కాంగ్రెస్, ఏనాడూ చంద్రబాబును ఇబ్బంది పెట్టలేకపోయింది అవినీతి ఆరోపణల విషయంగా. 

            అందుకే ఇవాళ్టి రాజకీయాల్లో నేరారోపణలు అన్నది ఒక క్లిష్టమైన అంశమే కాక కాస్త సున్నితమైన అంశం కూడానూ. తమకు అడ్డు రానంతవరకూ సహిస్తారు ఎప్పుడైతే తమకు అడ్డొస్తారో లేదా తమను మించి పోతారనిపిస్తుందో అపుడు ఉపయోగించే అనేకానేక మార్గాలలో కేసులు అన్నవి ఒకటి. అందులో నిజం ఉండినా కూడా, తమకు అడ్డు రానంతవరకూ, తమ పక్షంలో ఉన్నంతవరకూ పట్టించుకోరు. మీడియా ఛానెల్స్ లో కూచునే వ్యాఖ్యాతలు తమకుతామే తీర్పులిచ్చేస్తూ, నేర నిర్ధారణ చేస్తూ, నేరస్తులెవరో చెప్పేస్తున్న ఇవాళ్టి రాజకీయాల్లో ఎవరైనా ఒక వ్యక్తిని కేసులు చూపి, పక్కకు పెట్టలేమేమో అన్నది నా అభిప్రాయం. ఇది ఏ ఒక్కరినో ఉద్దేశిస్తూనో లేక బలపరుస్తూనో చెప్పేది కాదు - ఇవాళ్టి రాజకీయాల తీరు గురించి వేదన అంతే.