... మాది రాయలసీమ

వంశీ కలుగోట్ల // ... మాది రాయలసీమ // 

******************************************

రాయలసీమ రౌడీలు 

కడప రౌడీలు 

పులివెందుల గూండాలు 

            ఇవీ మన గౌరవ మాజీ ముఖ్యమంత్రివర్యులు మరియు మహా ప్రముఖ నటులు, జనసేనాని అనేక సందర్భాలలో వాడిన పదాలు. నిజంగా రాయలసీమవాసులు వారు పేర్కొనేంతటి కరడుగట్టిన రౌడీలు అయ్యుంటే, రాయలసీమలోకి వచ్చాక సరిహద్దులు దాటి అడుగు బయటకు పెట్టగలిగేవాళ్ళు కాదు. కానీ, తన మీద హత్యాయత్నం చేసిన ప్రాంతం వారిని జగన్ ఏనాడూ రౌడీలనో, హంతకులనో  అనలేదు. ఒక్కరి/కొందరి చర్యలకు, ప్రాంతానికి సంబంధం లేదన్న కనీసపాటి విజ్ఞత లేని వాడిలా ప్రవర్తించలేదు. జరిగిన ప్రతి ఘటననూ ప్రతిపక్షానికే ఆపాదించి, రాయలసీమ రౌడీలని (తనదీ రాయలసీమేనన్న ఇంగిత జ్ఞానం కూడా లేకుండా) ఆయన అనటం; ఆ తరువాత కొన్నాళ్ళకు పులివెందుల గూండాల చర్యలను సహించనని జనసేనాని తందానా తాళమేయడం. ఇంతా చేసి ఆ ఇద్దరి మీదా ఎటువంటి వ్యక్తిగత దాడి కూడా వారు పేర్కొంటున్న ప్రాంతాల వారు చెయ్యలేదు, ఇక ఆ నటుడిపై జరుపడిందని చెప్పబడుతున్న దాడి కూడా ఇప్పుడాయన తందానా తాళమేస్తున్న పార్టీకి చెందినవారే చేశారని గాలివార్తలు. 

            అయినా అపుడంతా మౌనం వహించిన వాళ్ళందరూ ఇపుడు రౌడీ రాజ్యం వచ్చింది అని బాధపడుతున్నారు. ఇంకా జగన్ ప్రమాణ స్వీకారం కూడా చేయలేదు. అయినా ఒకసారి కావాలంటే ఆర్టీఐ ఉపయోగించి, ఎవరి హయాంలో ఎక్కువ క్రైమ్ రేట్ ఉండిందో తెలుసుకోవచ్చు. అమావాస్య తెలివి ముఖాలకు అంతటి యోచన ఎలా వస్తుందిలే, ఏదో ఏ చంద్రజ్యోతివాడో లేక ఈనాడులోనో రాస్తే అదే నిజమని నమ్మే గొప్పవారు కదా. పోలింగ్ రోజుకు ముందువరకూ జరిగిన ప్రచార వీడియోస్ ఒకసారి తిరగేస్తే తోలు తీస్తా, తాట తీస్తా, తరిమి కొడతా, అదీ ఇదీ అంటూ పట్టలేనంత ఆవేశంతో వేదికలపై ఊగిపోయినదెవరు? కులం పేరును ప్రస్తావిస్తూ 'అతడేం రెడ్డి' అంటూ రెచ్చగొట్టటానికి ప్రయత్నించిందెవరు? మగతనం, కులం ప్రస్తావన తెచ్చిందెవరు? రాయలసీమ రౌడీలు, పులివెందుల గూండాలు అంటూ ఊగిపోయిందెవరు?  సమాధానాలున్నాయా? 

            ఇపుడు జగన్ గెలుపు గురించి బాధ పడుతూ, రౌడీ రాజ్యం వచ్చిందని బాధపడుతున్న మహానుభావులందరూ ఎన్నికలకు ముందు ఏం చేస్తున్నారు? మీ ప్రయత్నం మీరు చెయ్యాల్సింది అతడికి గెలుపు దక్కకుండా. కనీసం పోరాడామన్న ఆనందమన్నా దక్కుండేది మీకు. అయినా దాదాపు 85% కి పైగా సీట్లను, 50% కి పైగా ఓట్లను సాధించాడంటే ఏమిటర్థం? మీరు సమర్థించే పార్టీ/వ్యక్తి మీరిప్పుడు ఇతడిని ఎలా భావిస్తున్నారో అంతకంటే దిగువన ఉన్నాడని అధిక సంఖ్యాక ప్రజలు అనుకున్నారు/నమ్మారు, నమ్మి ఇతడికి ఓట్ వేశారు అని అర్థం కావచ్చు కదా. ఎందుకంటే ఇదే మీరు 2014 లో జగన్ ను జనాలు ఎన్నుకోలేదంటే అతడి అవినీతిని నమ్మారు, అతడు రౌడీ అని నమ్మారు గట్రా చెప్పారు కదా. అది నిజమైనపుడు, ఇదీ నిజమే అవుతుంది కదా. ఇపుడు ప్రజలు స్పష్టమైన తీర్పు ఇచ్చారు, వేచి చూద్దాం. అతడు రౌడీ రాజ్యమే చేస్తే, అరాచక పాలనే చేస్తే - ప్రత్యామ్నాయం లేకపోయినా సరే పాతరేస్తారు జనాలు. రాజకీయ నాయకులు తమదాకా రానంతవరకూ ఏం చేసినా పట్టించుకోరు జనాలు, అదే తమదాకా వస్తే తమదైన రోజున మడత పెట్టి, అస్సామ్ కు పార్సెల్ చేస్తారని ఈ ఎన్నికలు నిరూపిస్తున్నాయి. జనాలు మీరనుకున్నంత మూర్ఖులు కాదు. ఎన్నికల్లో కేవలం డబ్బు, మందు మాత్రమే ప్రభావం చూపవు. మంచితనం కంటే సమర్థులకే జనాలు పట్టం కడతారు. 

* .           * .           *

మేమిక్కడ, రాయలసీమ గడ్డమీద 

తినడానికి తిండి సరిగా లేకపోయినా 

మొక్క మొలవని చేనులో 

మా పోరాటం చేస్తూనే ఉంటాం  

కురవని వాన దోబూచులాడుతున్నా 

భూమినే నమ్ముకుని బతుకుతుంటాం  

ఈ సీమ బతుకునిచ్చింది, బతకనిచ్చింది  

కానీ, నువ్వు మాత్రం అక్కడెక్కడో ఉండి 

మా గురించి కథలల్లుతావు 

కత్తులు పట్టకపోతే తిరగలేమని 

నీరు పారకపోయినా 

రక్తాలు పారించుకునే కక్షలు మావని 

కన్నబిడ్డలను చంపుకునే పగలు మావని 

మీరు సినిమాలు తీస్తారు  

రాయలసీమ రౌడీలు అంటారు  

పులివెందుల గూండాలంటారు  

కడప రౌడీలు అంటారు 

ఈ సీమ గడ్డమీద నిలబడి 

సీమోళ్ళనే నోటికొచ్చిన మాటలు అన్నా 

నిన్నెవరూ ఏమీ అనరు ... నువ్వు క్షేమమే 

ఇక్కడ అలవాటైపోయిన బతుకులు నీకు తెలుసా 

ఒక్క చుక్క వర్షం పడినా పంట వేస్తారు  

వర్షం పడేవరకూ ఎదురు చూస్తారు  

ఆకాశం మీద అరుస్తామా, పొలం మీద కోప్పడతామా చెప్పు 

అందుకే, నీమీద కూడా కోపం ఏమీ లేదబ్బా 

నువ్వన్నదానికంతటికీ కలిపి ఒకటే సమాధానం చెప్పేశాం - ఓటుతో 

మాది రాయలసీమే ... కానీ, చంపుకోవడాలు మా వృత్తి కాదబ్బా 

నువ్వెప్పుడొచ్చినా, మాకున్నదాంట్లో ఇంత తిండి పెడతాం ... రా