... 2019 ఆంధ్రప్రదేశ్ ఎన్నికలు - వైఎస్సార్సీపీ

వంశీ వ్యూ పాయింట్ // ... 2019 ఆంధ్రప్రదేశ్ ఎన్నికలు - వైఎస్సార్సీపీ //

*******************************************************************

            2019 ఎన్నికల సందర్భంగా వివిధ రాజకీయ పక్షాల అవకాశాల గురించి రాస్తానని చెప్పాను - ఒక్క వైఎస్సార్సీపీ తప్పించి మిగతా పక్షాల అవకాశాల గురించి నా దృక్కోణంలోంచి విశ్లేషణ చేస్తూ, వివరణ ఇస్తూ వ్యాసాలు రాశాను. ఇక ఇది చివరిది - ఇందులో వైఎస్సార్సీపీ అవకాశాల గురించి ప్రస్తావిస్తాను. ఇప్పటికే రాసిన మిగతా వ్యాసాలు చదివిన వారికి స్పష్టంగా అర్థమయ్యేదేమిటంటే - ఈసారి వైఎస్సార్సీపీ ప్రభుత్వం ఏర్పాటు చేసే అవకాశాలు సుస్పష్టంగా ఉంన్నాయి అన్నది నా అంచనా. పలు జాతీయ, స్థానిక సర్వేలు కూడా అదే విషయాన్ని ప్రస్తావించాయి. నేను వారి స్థాయిలో సర్వేలు అవీ ఏమీ చెయ్యలేదు. నా పరిధిలో, తెలుసుకున్న విషయాలను సమీక్షించుకుని అంచనాలను ఏర్పరచుకున్నాను. వైఎస్సార్సీపీ అవకాశాలను గురించి చర్చించుకునే ముందు - కొన్ని అంశాలను ప్రస్తావించుకోవాలి. 

             ముందుగా తెదేపా మరియు వారి పక్కవాయిద్యాలు ప్రచారం చేస్తున్న జగన్ పై కేసులు, గత రెండు సంవత్సరాలుగా శాసనసభ సమావేశాలకు హాజరు కాకపోవటం అందులో ప్రధానమైనవి. జగన్ పై కేసులు, అవినీతి ఆరోపనలు అన్నవి ఇవాళ కొత్తవి కాదు. గత తొమ్మిది సంవత్సరాలుగా అవే అవే కథనాలు హెడ్డింగ్స్ మారుస్తూ పచ్చమీడియా ప్రచారం చేస్తూనే ఉంది, ఇప్పటికంటే ఎక్కువగా ప్రచారం చేసిన 2014 సమయంలోనే జగన్ 67 స్థానాలు గెలుచుకోగలిగాడు. అందునా, రాజకీయాల్లో అవినీతి అన్నది జనాలు పట్టించుకోవడం మానేసి దశాబ్దాలు గడిచిందేమో. ఎందుకంటే ప్రజల దృష్టిలో తమకు నచ్చిన రాజకీయ నాయకుడు 'లెస్సర్ ఈవిల్' అంతే. దాని అర్థం జగన్ గారిపై ఆరోపణలు ధృవీకరించేంచినట్టుగానో లేకపోతే కొట్టిపారేసినట్టుగానో కాదు. పరిస్థితిని చెబుతున్నాను ఆంతే. మోదీ మొదలుకొని, మాజీ సర్పంచ్ దాకా అవినీతి ఆరోపణలు లేని రాజకీయ నాయకుడు దాదాపు ఉండరు. రుజువై, శిక్షలు పడినవారు కూడా మళ్ళీ ప్రజాక్షేత్రంలో ఉన్నారు. ఇక జగన్ గారిపై అవినీతి ఆరోపణలు ఇంకా కోర్ట్ పరిధిలో ఉంన్నాయి కాబట్టి, అవి తేలేవరకూ అతడు ఆరోపణలు ఎదుర్కొంటున్నవాడుగానే చూడబడతాడు కానీ నేరస్థుడు కాదు అని నా అభిప్రాయం. (ఇది ఒక్క జగన్ విషయంలో కాదు, ఎవరి విషయంలోనైనా అంతే) ఇక శాసనసభకు హాజరు గురించి. ఫిరాయింపు ఎమ్మెల్యేల మీద చర్యలు తీసుకోమని ఎంతగా అడిగినా స్పీకర్ ఇంతవరకూ స్పందించలేదు, చివరకు కోర్ట్ ఆదేశించినా స్పీకర్ కోర్ట్ పరిధిలోకి రద్దు అని చెప్పి తప్పించుకుంటున్నారు; గతంలో ఎన్నడూ లేని విధంగా స్పీకర్ అటు సభలోనూ, బయటా పూర్తిగా తెదేపా వ్యక్తిగా వ్యవహరిస్తున్నారు. రోజా విషయంలో, రోజాతో సమానంగా లేదా అంతకుమించిన స్థాయిలో అభ్యంతరకరమైన భాష మాట్లాడినా అచ్చెన్నాయుడు వంటివారిపై చర్యలు తీసుకోకపోగా కేవలం రోజా మీద మాత్రమే చర్యలు తీసుకున్నారు. ఇక సభలో ప్రతిపక్షనేత జగన్ అంకెలతో కూడిన వివరాలతో ప్రశ్నిస్తూ ఉంటే, అధికార పార్టీ సభ్యుల తీరు అందరూ చూసినదే. ప్రతిపక్షం శాసనసభకు హాజరు కాకపోవడంతో స్పీకర్ పాత్ర ప్రధానమైనది. బాధ్యతాయుతంగా వ్యవహరించవలసినా స్పీకర్, పక్షపాతంగా వ్యవహరించడం వేరే దారిలేని పరిస్థితి ఏర్పరచింది. 

             ఇక వైఎస్సార్సీపీ బలమూ మరియు బలహీనతా రెండూ అధినేత జగన్ మాత్రమే. తొమ్మిదేళ్ళుగా ఉన్నప్పటికీ ఇంకా కొన్ని ప్రాంతాలలో పటిష్ట క్యాడర్ వ్యవస్థను ఏర్పరచుకోలేకపోవడం ఒక ప్రధాన లోపం కాగా, ఇతర నాయకులందరూ (ఎవరో ఆర్కే లాంటి కొందరు వదిలేసి) ఇప్పటికీ జగన్ మీదే ఆధారపడటం అతి ప్రధానమైన సమస్య. జగన్ గారు చేసిన అతి సుదీర్ఘ పాదయాత్రతో పాటు, పలు కీలక/సున్నిత సందర్భాలలో ఏంటో పరిణితితో మరియు సంయమనంతో వ్యవహరించినతీరు తటస్థులలో కూడా మంచి అభిప్రాయాన్ని ఏర్పరచింది. ముఖ్యంగా అటు పవన్ ఇటు తెదేపా ఎంతగా రెచ్చగొడుతున్నప్పటికీ తాను సంయమనంతో ఉండటమే కాక తన పార్టీ అభిమానులు, కార్యకర్తలు కూడా అదుపులో ఉండేలా చెయ్యటం బాగుంది. ఇవన్నీ బహుశా వ్యూహాలే కావచ్చు. ఇటీవలి టీవీ9 మరియు ఇండియా టుడే సదస్సులలోని జగన్ ఇంటర్వ్యూలు మంచి ఇంపాక్ట్ కలగజేసాయి అని చెప్పవచ్చు. 

             ఇక ప్రాంతాలవారీగా చూస్తే రాయలసీమ వైఎస్సార్సీపీకి పెట్టని కోట అని చెప్పవచ్చు. గత ఎన్నికల్లో రైతు రుణమాఫీ, మోదీ ఇమేజ్, విభజన వల్ల కాంగ్రెస్ పట్ల ఉన్న తీవ్ర వ్యతిరేకత అంతా మోదీ వైపు పాజిటివ్ గా మళ్ళడం - అటువంటి మోదీతో తెదేపా పొత్తులో ఉండటం, పవన్ కళ్యాణ్ ఫాక్టర్ వంటివి ప్రతికూలంగా పని చేసినప్పటికీ రాయలసీమలో సగానికి పైగా సెట్లు గెలుచుకోవడం దీనికి నిదర్శనం. ఈసారి కాంగ్రెస్ తో పాటు భాజపా కూడా సోదిలో లేకుండా పోయాయి. కాగా పవన్ బీఎస్పీతో పొత్తులో భాగంగా రాయలసీమలో అత్యధికభాగం వారికే వదిలేశాడు. ఇక రుణమాఫీ వంటి అనేక హామీలు సరిగా అమలు కాకపోవడం, పలు ఇతర పథకాలలో జన్మభూమి కమిటీల పక్షపాత ధోరణి విపరీతమైన వ్యతిరేకతను ఏర్పరచాయి. ఎలా చూసినా కూడా రాయలసీమలో గతంలో కంటే ఎక్కువగానే సీట్లు వచ్చే పరిస్థితి ఉంది. రాయలసీమలోని మొత్తం 54 సీట్లలో దాదాపు 40 నుండి 45 దాకా వైఎస్సార్సీపీ గెలిచే అవకాశాలున్నాయన్నది నా అంచనా. ఇక మిగతా ఆంద్ర ప్రాంతంలోని 121 సీట్లలో పవన్ కళ్యాణ్, కే ఏ పాల్ వంటివారు చీల్చే వోట్లు, గెలిచే సీట్లు పోగా 65 నుండి 75 దాకా వైఎస్సార్సీపీ గెలిచే అవకాశం ఉంది. మొత్తంగా ఈ ఎన్నికల్లో వైఎస్సార్సీపీ 105 నుండి 120 దాకా స్థానాలు సాధించి ప్రభుత్వం ఏర్పరచే అవకాశాలు సుస్పష్టంగా ఉన్నాయి అన్నది నా అంచనా. 

             ఈ అంచనాలలో ఒక పదిశాతం అటూ ఇటూగా తేడా ఉండవచ్చు. తెదేపా అంచనాలలో రెండుమూడు శాతం మాత్రం తేడా ఉండవచ్చు అని చెప్పిన నేను ఇక్కడ పదిశాతం అనడానికి ప్రధాన కారణం - తెదేపా అధికార వర్గాలను ఉపయోగించుకుంటున్న తీరు, విపరీతమైన డబ్బు పంపిణీ వంటివి కొన్ని ప్రాంతాలలో ప్రభావం చూపవచ్చు. మరికొన్ని ప్రాంతాలలో ప్రజలు పోలింగ్ బూట్ ల దాకా రాలేని భయానక స్థితి కల్పించబడవచ్చు. కానీ, అటువంటి చర్యలన్నీ వైఎస్సార్సీపీ ఆధిక్యతను తగ్గించగలవేమో కానీ అధికారానికి దూరం చేయలేవని నా అభిప్రాయం. ముందుగానే చెప్పినట్టు ఇవి కేవలం నా అంచనాలు. నిజమవుతాయా కాదా అని చెప్పలేను. ఇంతవరకూ ఇంత సవివరణాత్మకంగా ఎపుడూ రాయలేదు. గతంలో గెలుపోటముల గురించి అణా=చానళ్లను క్లుప్తంగా ఇచ్చాను కానీ, ఇపుడు నాకు ఎందుకలా అనిపించిందో వివరిస్తూ వివరణాత్మకంగా రాశాను. మీరు ఏకీభవించవచ్చు లేదా విభేదించవచ్చు. మీ ఇష్టం ...