... రెండు మాటలు

వంశీ కలుగోట్ల // ... రెండు మాటలు //

********************************

            మొదటిది - ప్రధానమంత్రి మాట్లాడిన ప్రతిసారీ ముఖం చాలా బాధగా పెట్టి, ఏదేదో మాట్లాడుతున్నారు కానీ వలసకూలీల సమస్యల గురించి ప్రస్తావించటం లేదు. స్వాన్ (స్ట్రాండెడ్‌ వర్కర్స్‌ యాక్షన్‌ నెట్‌వర్క్‌) దేశవ్యాప్తంగా ఏప్రిల్‌ 9వ తేదీ వరకు (ఇవాళ 29 వ తేదీ, ఈ ఇరవై రోజుల్లో ఇంకెన్ని జరిగాయో అధికారిక లెక్కలు నాకైతే తెలియదు) 11 వేల మంది వలస కార్మికులను విచారించగా లాక్‌డౌన్‌‌ కారణంగా 189 మంది వలస కార్మికులు మరణించారు. వీరిలో ప్రయాణంలో ప్రాణం విడిచిన వారు, ఆకలితో మరణించినవారు, స్వీయమరణాలు పొందిన వారు ఉన్నారు. దేశవ్యాప్తంగా చిక్కుకుపోయిన లక్షలాది మంది వలస కార్మికుల్లో కేవలం ఆరు లక్షల మందికి వసతి కల్పించినట్లు, దాదాపు 22 లక్షల మందికి ఆహారం అందజేస్తున్నామని కేంద్ర ప్రభుత్వం ఏప్రిల్‌ ఒకటవ తేదీన సుప్రీం కోర్టుకు తెలియజేసింది. ‘స్వాన్‌’ నిర్వహించిన సర్వే ప్రకారం 84 శాతం వలస కార్మికులకు యాజమాన్యం వేతనాలు చెల్లించలేదు. వారిలో 98 శాతం మంది ప్రభుత్వం నుంచి ఎలాంటి ఆర్థిక సహాయం పొందలేదు. 70 శాతం మందికి రేషన్‌ అందలేదు. 50 శాతం మందికి తినడానికి తిండి, చేతిలో చిల్లి గవ్వా లేదు. ఇలాంటి పరిస్థితుల్లో ప్రభుత్వం నుండి అధికారికంగా వారికి ఊరటనిచ్చేటటువంటి ప్రకటన గానీ, చర్యలు గానీ లేకపోవటం బాధాకరం. కరోనా విపత్తు కావచ్చు, కానీ ఆకలి మరియు పేదరికం అన్నవి కరోనాను మించిన విపత్తులు. 

            రెక్కాడితే కానీ డొక్కాడని బతుకులు మన దేశంలో లక్షలకొద్దీ ఉన్నాయి - వారి పరిస్థితి ఏంటన్న కనీస కార్యాచరణ ప్రణాళిక, ఆలోచన, ఆచరణ లేకుండా కరోనా భయం చూపి లాక్డౌన్, నిబంధనలు అంటే అది సమాజంలో అశాంతికి కారణం కాగలదు. కరోనా (లేదా కోవిద్ 19) కంటే ఎక్కువగా సామాజిక అశాంతి దేశాన్ని దెబ్బ తీయగలదు. వలస కార్మికులకు ప్రభుత్వం ప్రత్యామ్నాయ మార్గాల ద్వారా ఆహారం మరియు ఉపాధి చూపలేకపోతే అది దేశాన్ని దారుణమైన పరిస్థితుల్లోకి నెట్టేయగలదు. మాటలగారడీ పక్కనబెట్టి, ఈ విషయంలో చిత్తశుద్ధితో ఆచరణ దిశగా మోదీ ప్రభుత్వం చర్యలు చేపట్టవలసిన ఆవశ్యకత ఉంది.    

*

            రెండవది - తెలంగాణాలో ఎందుకు కరోనా నిర్ధారిత టెస్ట్స్ సంఖ్య పెంచటం లేదు? తెలంగాణ కంటే ఎన్నో తక్కువ కేసులు నమోదు అయిన, కేసులు పెరుగుదల తక్కువగా ఉన్న కర్ణాటక (42964 టెస్ట్స్) వంటి రాష్ట్రాలు కూడా తెలంగాణ (19000+ టెస్ట్స్) కంటే ఎక్కువ స్థాయిలో టెస్ట్స్ చేస్తున్నట్టుగా ఉంది. అంతేకాక సౌత్ కొరియా నుండి 80 వేల ఉన్నతశ్రేణి టెస్ట్ కిట్స్ ఆర్డర్ చేసింది. కానీ, తెలంగాణ మాత్రం టెస్ట్స్ నిర్వహించే తీరులో నిమ్మకు నీరెత్తినట్టు వ్యవహరిస్తోంది. ఉదాహరణకు రెండు రోజుల క్రితం ఆంధ్రప్రదేశ్ 6500+ టెస్ట్స్ చేయగా, తెలంగాణ 150 టెస్ట్స్ చేసింది. ఆర్థికంగా తెలంగాణ కంటే ఎంతో వెనుకబడిన ఆంధ్రప్రదేశ్ 11 ఉన్నత స్థాయి టెస్ట్ సెంటర్స్ ను ఏర్పాటు చేసుకోగలిగింది. మరి తెలంగాణ ఎందుకు చేసుకోలేకపోతోంది? తెలంగాణాలో నాలుగు టెస్ట్ సెంటర్స్ ఉన్నాయని చదివినట్టు గుర్తు. రికవరీ రేట్ పరంగా తెలంగాణ మెరుగ్గా ఉంది కానీ, విస్తృతస్థాయిలో పరీక్షలు చేయకపోతే, నిబంధనలు దశలవారీగా సడలిస్తారని అంటున్నారు కాబట్టి వైరస్ విస్తృతి రానున్న రోజుల్లో మరింత సమస్యాత్మకంగా మారే అవకాశం ఉంది. కెసిఆర్ ప్రెస్ మీట్ లో మాట్లాడిన తీరుకు కొట్టే చప్పట్ల శబ్దం తగ్గితే, ఇవన్నీ వినబడవచ్చు లేదా కనబడొచ్చు. పరిస్థితి చూస్తోనే తెలంగాణాలో మెరుగ్గా ఉన్నది పరిస్థితులు అనేకంటే కెసిఆర్ ప్రెస్ మీట్స్ అని చెప్పాలేమో అనేలా ఉంది. 

            మిగతా రాష్ట్రాలు ఎన్నో ఉండగా ఒక్క తెలంగాణను మాత్రమే ఈ విషయంలో ప్రస్తావించడం ఎందుకు అంటే - హైదరాబాద్ లో కేసెస్ సంఖ్యా చూస్తే తెలుస్తుంది. అలాగే, ప్రజల తీరు కూడా. అయినా కూడా రాష్ట్రం మొత్తం మీద ఒక రోజులో కేవలం 150 పరీక్షలే చేశారంటే (ఎక్కువగా అంటే దాదాపు 500/600 చేస్తున్నారు) అది నిర్లక్ష్యమనుకోవాలా, నిర్వహణలోపం అనుకోవాలా - లేక మరేమిటి? కొన్నిరోజుల క్రితం మినిస్ట్రీ అఫ్ హోమ్ అఫైర్స్ కూడా ఇదే అభిప్రాయం వెలిబుచ్చింది - హైదరాబాద్ నగరంలో సరైన సంఖ్యలో పరీక్షలు జరిగితే గానీ అసలు పరిస్థితులు అర్థం కావు, కేసులు విపరీతంగా పెరగవచ్చు అని. తెలంగాణాలో చాలా రాష్ట్రాల కంటే మెరుగైన వైద్య సదుపాయాలున్నాయి కాబట్టి, కోలుకుంటున్న వారి సంఖ్య ఎక్కువగా ఉండటం మరియు మరణాల సంఖ్య తక్కువగానే ఉండటం సంతోషకరమైన విషయం. కానీ, తెలంగాణాలో కోవిద్ 19 పరీక్షల సంఖ్య పెంచవలసిన ఆవశ్యకత మాత్రం ఉంది. ఆ దిశగా తెలంగాణ ప్రభుత్వం చర్యలు చేపట్టాలి. ఎన్ని నిర్వహణా లోపాలున్నా కెసిఆర్ ఒక్కక్క ప్రెస్ మీట్ పెడితే చాలు అనే ధోరణి సరికాదు. ఆలోచించండి.